Mae Llais yn ymateb i’r ymchwiliad i safonau data a llywodraethu ym Mwrdd Iechyd Prifysgol Betsi Cadwaladr

Pan fo data perfformiad y GIG yn aneglur neu’n annibynadwy, mae’n tanseilio hyder y cyhoedd ac yn gadael pobl yn ansicr ynghylch beth sy’n digwydd mewn gwirionedd gyda’u gofal. Mae pobl eisiau gwybod nad yw eu safle ar restrau aros, a’u gofal, yn cael ei effeithio. 

Nid mater technegol yn unig yw data dibynadwy – mae’n hanfodol ar gyfer cynllunio gwasanaethau, mynd i’r afael ag oedi, a sicrhau bod ymrwymiadau fel lleihau amseroedd aros yn arwain at newid go iawn y gall pobl ei weld a’i deimlo. 

Bydd llawer yn gofyn pam na fydd ffigurau rhestrau aros BIPBC yn cael eu cyhoeddi tan i’r ymchwiliad ddod i ben. Mae’n hanfodol bod y bwrdd iechyd a Llywodraeth Cymru yn egluro’r penderfyniad hwn yn glir ac, yn y cyfamser, yn dangos perfformiad y Bwrdd Iechyd yn y maes hwn fel y gall y cyhoedd fod yn hyderus bod cynnydd yn cael ei wneud. 

Efallai y bydd pobl hefyd yn cwestiynu a ellir ymddiried mewn data perfformiad arall. Rydym yn annog y ddau sefydliad i roi’r sicrwydd hwnnw ar unwaith. Mae tryloywder yn hanfodol i gynnal hyder ac ymddiriedaeth. 

Dywedodd Geoff Ryall-Harvey, Cyfarwyddwr Rhanbarthol Llais ar gyfer Gogledd Cymru: 

“Mae pob ystadegyn yn cynrychioli rhywun sy’n aros am ofal. Os nad yw’r data ar gael, mae’n anoddach trwsio oedi a chynllunio gwasanaethau’n iawn. Gobeithio y bydd yr ymchwiliad hwn yn helpu i symud tuag at wybodaeth gliriach a gwell gofal i bobl a chymunedau.” 

Mae Llais yn clywed yn rheolaidd gan bobl yng Ngogledd Cymru am effaith arosiadau hir ar eu hiechyd, eu llesiant a’u bywydau bob dydd. 

Byddwn yn parhau i wrando a rhannu’r lleisiau hyn i helpu i yrru gwelliannau mewn gwasanaethau iechyd a gofal cymdeithasol.