Mae Llais yn croesawu ymgysylltiad ar ddyfodol Meddygfa Sarn
Mae Llais yn croesawu penderfyniad Bwrdd Iechyd Prifysgol Hywel Dda i ohirio eu penderfyniad ar ddyfodol Meddygfa Sarn er mwyn caniatáu cyfnod o wyth wythnos o ymgysylltu â'r gymuned.
Mae Meddygfa Sarn yn feddygfa sefydledig sy'n gwasanaethu cymuned glos, ac mae pobl wedi dweud wrthym ba mor bwysig yw hi iddyn nhw fod yn rhan o drafodaethau am newidiadau i wasanaethau meddygon teulu lleol. Mae'r cyfnod ymgysylltu hwn yn rhoi cyfle i'r Bwrdd Iechyd esbonio'r heriau y mae'n eu hwynebu, archwilio opsiynau, a deall yr effaith bosibl ar gleifion a'r gymuned ehangach.
Bydd Llais yn parhau i fod yn annibynnol drwy gydol y broses hon, gan wrando ar bobl leol a chynrychioli eu barn i'r Bwrdd Iechyd.
Mae Meddygfa Sarn yn feddygfa teulu sy'n gwasanaethu ardal Pont-iets. Mae'r Bwrdd Iechyd wedi bod yn ystyried cynigion sy'n ymwneud â darparu gwasanaethau meddyg teulu yn y dyfodol yn dilyn heriau parhaus o ran cynnal y practis.
Yn dilyn yr hyn a glywodd Llais gan gleifion a'r gymuned leol, ysgrifennodd Llais at y Bwrdd Iechyd yn nodi pwysigrwydd cynnwys pobl cyn gwneud unrhyw benderfyniad. Wedi hynny, cyflwynwyd papur i'r Bwrdd Cyhoeddus, gan gynnwys argymhelliad i wasgaru cleifion i feddygfeydd eraill o fewn clwstwr meddygon teulu lleol, ochr yn ochr â chynnig ar gyfer ymgysylltu â'r cyhoedd.
Mae'r Bwrdd bellach wedi cytuno i ohirio penderfyniad a chynnal cyfnod o wyth wythnos o ymgysylltu â'r gymuned.