Ein Hadroddiad Blynyddol a Chyfrifon 2024-2025
Yr wythnos hon fe wnaethom gyhoeddi ein hadroddiad blynyddol a'n Cyfrifon ar gyfer 2024–2025.
Yn 2024-2025 fe wnaethom barhau i dyfu, o ran cyrhaeddiad, dylanwad a phwrpas. Fe wnaethom glywed gan fwy na 40,000 o bobl ledled Cymru, a'u cefnogi, sef traean yn fwy na'r flwyddyn flaenorol. Dyna dros 40,000 o straeon, pryderon, syniadau a phrofiadau sydd wedi helpu i lunio sut mae gwasanaethau yn ymateb i'r hyn sy'n bwysicaf i bobl.
Rydym wedi cefnogi bron i 2,000 o gwynion ffurfiol, wedi gwneud dros 550 o gynrychioliadau i'r rhai sy'n gwneud penderfyniadau, ac wedi cymryd rhan mewn dros 400 o gyfarfodydd a rhwydweithiau ffurfiol. Mae ein gwaith wedi helpu i wella mynediad, cyfathrebu a gofal ar draws ystod eang o wasanaethau, o adrannau mamolaeth ac achosion brys i ddeintyddiaeth ac iechyd meddwl.
Does dim o hyn yn digwydd heb y bobl y tu ôl iddo. Felly, diolch i'n staff a'n gwirfoddolwyr, mae eich gwaith yn gwneud Llais yr hyn ydyw.
Fe wnaethom gyflawni dros 90% o'r amcanion yn ein Cynllun Blynyddol, a lle cymerodd pethau'n hirach, rydym wedi dysgu ac addasu ar gyfer eleni. Rydym wedi cryfhau ein llywodraethu, gwella ein systemau, ac adeiladu fframweithiau newydd ar gyfer ymgysylltu, tegwch a mewnwelediad, ac mae pob un ohonynt wedi golygu effaith ar bobl a chymunedau ledled Cymru.
Rydym yn gwybod bod angen i ni glywed mwy gan leisiau sydd wedi'u tangynrychioli, yn enwedig mewn gofal cymdeithasol, ac rydym yn gwybod bod angen i'n heffaith fod yn gliriach ac yn cael ei gyfathrebu'n well. Eleni byddwn yn gwella yn y meysydd hyn ac yn parhau i adeiladu perthnasoedd ledled Cymru fel y gallwn glywed gan fwy o bobl.