Llais yn Llofnodi’r Cytundeb Lluoedd Arfog
Ym mis Tachwedd 2025, roedd Llais, corff Llais y Dinesydd ar gyfer iechyd a gofal cymdeithasol yng Nghymru, wrth ei fodd yn llofnodi’r Cytundeb Lluoedd Arfog yn ystod Cynhadledd Cyflogwyr Lluoedd Arfog yng Nghymru yn Stadiwm Dinas Caerdydd. Llofnodwyd yr addewid hwn gan Gadeirydd Llais, Yr Athro Medwin Hughes, a’r Prif Weithredwr, Alyson Thomas. Mae’r llofnodi yn cadarnhau ymrwymiad Llais i gefnogi cymuned y Lluoedd Arfog – gan gynnwys personél sy’n gwasanaethu, cyn-filwyr a’u teuluoedd.
Drwy lofnodi’r Cytundeb, mae Llais wedi atgyfnerthu ei ymrwymiad i gymuned y Lluoedd Arfog ac i sicrhau nad ydynt dan anfantais wrth gael mynediad at wasanaethau Llais.
Byddwn yn:
• Sicrhau mynediad teg a chyfartal at wasanaethau Llais.
• Ystyried anghenion unigryw cymuned y Lluoedd Arfog ym mhob gweithgaredd ymgysylltu ac ymgynghori.
• Archwilio cyfleoedd i gefnogi cyn-filwyr ac aelodau wrth gefn mewn cyflogaeth.
• Codi ymwybyddiaeth ymhlith staff Llais am yr heriau sy’n wynebu cymuned y Lluoedd Arfog.
Er mwyn sicrhau bod ein haddewid yn trosi’n gweithredu ystyrlon sy’n fuddiol i gymuned y Lluoedd Arfog, mae Llais hefyd wedi penodi arweinydd strategol uwch i hyrwyddo’r Cytundeb o fewn y sefydliad.
Bydd y rôl hon yn helpu i wreiddio ei egwyddorion ym mholisïau ac arferion Llais, gan sicrhau bod cymuned y Lluoedd Arfog hefyd yn cael ei hystyried yn ein gwaith gyda sefydliadau’r GIG a gofal cymdeithasol.