Llais yn ysgrifennu at Lywodraeth Cymru ar ôl dyfarniad y Goruchaf Lys ar ddiogelwch rhag colli rhyddid

Rydym wedi ysgrifennu at Mabon ap Gwynfor, Ysgrifennydd y Cabinet dros Iechyd a Gofal, ar ôl dyfarniad diweddar Goruchaf Lys y DU ar ddiogelwch rhag colli rhyddid. 

Mae'r dyfarniad yn dod i rym ar unwaith a gallai effeithio ar bobl ledled Cymru sy'n dibynnu ar y diogelwch hyn i amddiffyn eu hawliau. Mae'n golygu bod y ffordd y mae'r gyfraith yn cael ei dehongli a'i chymhwyso wrth benderfynu a yw rhywun yn cael ei amddifadu o'i ryddid o dan y Ddeddf Galluedd Meddyliol wedi newid. 

Yn ein llythyr, fe wnaethom rannu pryderon ynghylch yr hyn a allai ddigwydd os nad oes canllawiau clir. Gallai rhai pobl golli amddiffyniadau pwysig, fel adolygiad annibynnol, eiriolaeth, a'r cyfle i herio penderfyniadau. 

Rydym hefyd yn poeni y gallai dulliau amrywio ledled Cymru, a allai arwain at wahaniaethau annheg yn dibynnu ar ble mae pobl yn byw. 

Rydym yn gofyn i Lywodraeth Cymru am eglurder brys ynghylch sut y bydd y newidiadau'n gweithio'n ymarferol, gan gynnwys: 

• canllawiau cenedlaethol clir ar gyfer cyrff y GIG, awdurdodau lleol a darparwyr gofal 

• dulliau cyson ledled Cymru 

• gwybodaeth glir, hawdd ei deall i bobl, teuluoedd a gofalwyr 

• sicrhau y gall pobl barhau i gael mynediad at gymorth a siarad drostynt eu hunain 

Rydym wedi dweud, er y gallai'r dyfarniad newid sut mae achosion yn cael eu diffinio, na ddylai wanhau hawliau pobl. 

Byddwn yn parhau i rannu'r hyn y mae pobl yn ei ddweud wrthym a gweithio i sicrhau bod hawliau'n cael eu diogelu, lleisiau'n cael eu clywed, a bod pobl yn rhan o benderfyniadau am eu gofal.