Rhaid i gynlluniau Gweinidog y Cabinet nawr droi’n newid go iawn i bobl

Yn dilyn datganiad Gweinidog y Cabinet dros Iechyd a Gofal ar flaenoriaethau ar gyfer iechyd a gofal cymdeithasol yng Nghymru, mae Llais wedi croesawu'r ffocws ar leihau amseroedd aros, gwella mynediad, cryfhau gofal cymdeithasol, ac ehangu gwasanaethau'n agosach at adref.

Mae'r cynlluniau'n cynnwys ymrwymiadau i ddileu arosiadau dwy flynedd o fewn misoedd, ehangu gofal sylfaenol, a buddsoddi mewn gwasanaethau cymunedol, ochr yn ochr â chamau gweithredu tymor hwy ar weithlu, digidol ac atal. 

Mae pwyslais clir hefyd ar wella integreiddio rhwng iechyd a gofal cymdeithasol, gyda ffocws ar wasanaethau mwy cydgysylltiedig a chyson ledled Cymru.

Dywedodd Alyson Thomas, Prif Weithredwr Llais:

“Mae llawer o’r hyn sydd wedi’i nodi ym mlaenoriaethau’r llywodraeth yn adlewyrchu’r hyn y mae pobl wedi bod yn ei ddweud wrthym ers peth amser. Mae pobl eisiau gwasanaethau sy'n haws eu cyrchu, wedi'u cydlynu'n well, ac sy'n darparu'r gefnogaeth gywir ar yr amser cywir, boed hynny drwy iechyd neu ofal cymdeithasol.

“Fodd bynnag, y prawf nawr fydd pa mor gyflym y bydd yr ymrwymiadau hyn yn arwain at welliannau gwirioneddol ym mhrofiadau pobl o ddydd i ddydd.

“Byddwn yn parhau i wrando ar brofiadau pobl wrth i’r cynlluniau hyn gael eu rhoi ar waith, gan ddefnyddio Egwyddorion y Bobl – yr hyn y mae pobl wedi’u dweud wrthym sydd bwysicaf iddyn nhw – i ddeall sut mae newidiadau’n gwneud gwahaniaeth o ddydd i ddydd ledled Cymru.”