Neb wedi'i adael ar ôl: Mae Llais yn galw am weithredu brys ar iechyd a gofal gwledig yng Nghymru
Yn ddiweddar, mae Llais wedi cyhoeddi sbotolau ar iechyd a gofal cymdeithasol gwledig, yn seiliedig ar yr hyn a glywsom drwy ein hymgysylltiad â phobl mewn ardaloedd gwledig yng Nghymru.
Mae'r neges yn glir: mae cymunedau gwledig yn teimlo eu bod yn cael eu hanwybyddu, ac mae newid yn rhy araf.
Er gwaethaf cynlluniau ac ymrwymiadau cenedlaethol, mae pobl mewn ardaloedd gwledig yn dweud eu bod yn dal i wynebu rhwystrau sy'n ei gwneud hi'n anoddach cael gofal. Nid yw'r heriau hyn yn newydd, ond maent yn dod yn fwy brys.
Ni ddylid derbyn hyn fel “dyma fel mae pethau”.
Yr hyn mae pobl yn ei ddweud wrthym
Mae pobl ledled cefn gwlad Cymru wedi rhannu eu profiadau, gan dynnu sylw at fylchau difrifol mewn gofal:
- Mynediad at ofal
- Rhwystrau trafnidiaeth
- Cymorth iechyd meddwl
- Prinder gweithlu
- Oediadau gofal brys
Er gwaethaf yr heriau hyn, siaradodd pobl am wydnwch eu cymunedau a gwerth gofal unwaith y gallant gael mynediad ato. Maen nhw eisiau gwasanaethau sy'n haws eu cyrraedd, yn fwy cyson, ac wedi'u halinio'n well â realiti gwledig.
Dywedodd Alyson Thomas, Prif Weithredwr Llais:
“Mae’r lleisiau rydyn ni wedi’u clywed yn dangos bod cymunedau gwledig yn ddyfeisgar, ond gofynnir iddyn nhw wneud gormod i lenwi bylchau mewn gwasanaethau ffurfiol. Mae pobl eisiau gofal sy'n adlewyrchu realiti bywyd gwledig, nid modelau un maint i bawb. Rhaid i Lywodraeth Cymru a GIG Cymru weithredu nawr i droi cynlluniau’n atebion ymarferol sy’n gweithio i gymunedau gwledig.”
Darllenwch ein hadroddiad yn llawn yma: Sbotolau ar iechyd a gofal cymdeithasol gwledig yng Nghymru | Llais